Toshkent shahar hokimi Shavkat Umurzakov Olmazor tumaniga tashrif buyurib, mahalla fuqarolari, faollar, nogironligi bo‘lgan shaxslar hamda ijtimoiy soha vakillari bilan uchrashuvlar o‘tkazdi.

Tashrif “Ma’lumot, hisobot, muloqot” nomli tamomila yangi formatda bo‘lib o‘tdi. Undan maqsad — aholini davlatimiz amalga oshirilayotgan loyihalar haqida xabardor qilish bilangina cheklanib qolmay, balki doimiy qayta aloqani yo‘lga qo‘yish, hududlarning ehtiyojlarini ochiq muhokama qilish, bajarilayotgan ishlar yuzasidan hisobot berish hamda fuqarolar bilan birgalikda kelgusi amaliy yechimlarni belgilab olishdan iborat.

Bunday hisobot uchrashuvlarini poytaxtning barcha tumanlarida o‘tkazish rejalashtirilgan. Hokimlikning asosiy vazifasi — davlatimiz Rahbarining tashabbuslari doirasida aholi bilan birgalikda Toshkentni dunyoning eng ilg‘or poytaxtlari bilan qiyoslanadigan qulay, zamonaviy va yashash uchun barcha sharoitlarga ega megapolisga izchil aylantirishdir.

Tashrif davomida shaharning va tumanning mutasaddi xizmatlari aholiga amalga oshirilayotgan loyihalar, bajarilayotgan ishlar va hududni rivojlantirish bo‘yicha rejalashtirilgan chora-tadbirlar haqida ma’lumot taqdim etdi. Suhbat hokimlikning mas’ul tuzilmalari va tegishli tashkilotlar ishtirokida ochiq muloqot tarzida kechdi. Suhbat davomida ijtimoiy xizmatlardan foydalanish, reabilitatsiya, davolanish, ta’lim olish, shuningdek, kundalik hayot uchun zarur shart-sharoitlarni yaratish masalalari muhokama qilindi. Ishtirokchilarga amaldagi qo‘llab-quvvatlash choralari va ayrim turdagi ijtimoiy xizmatlarni olish tartibi bo‘yicha tushuntirishlar berildi.

Shahar hokimi shahar loyihalarini rejalashtirishda barcha aholining, jumladan, nogironligi bo‘lgan shaxslar, keksa avlod vakillari va ijtimoiy xizmatlarning alohida e’tiboriga muhtoj kishilarning ehtiyojlarini hisobga olish muhimligini ta’kidladi. Muhokama yakunlari bo‘yicha mutasaddi tashkilotlarga murojaatlarni yanada sinchiklab o‘rganish va ko‘rsatilayotgan xizmatlar sifatini yaxshilash yuzasidan tavsiyalar berildi.

Navbatdagi manzil “Gulzor” mahallasida joylashgan 180 o‘rinli 4-sonli maktabgacha ta’lim tashkiloti bo‘ldi. Bu yerda bolalar uchun yaratilgan sharoitlar o‘rganildi, shuningdek, muassasa xodimlari, ota-onalar va mahalla ahli bilan muloqot qilindi.

Ta’lim sohasi vakillari tumanning ta’lim infratuzilmasini kengaytirish borasida olib borilayotgan ishlar haqida ma’lumot berdilar. Maktabgacha ta’lim qamrovini kengaytirish, bolalar uchun qulay sharoitlar yaratish, pedagoglarni qo‘llab-quvvatlash va ta’lim muassasalarini yanada rivojlantirish masalalari muhokama etildi.

2026-yilda Olmazor tumanida ikkita maktabgacha ta’lim obyekti qurish hisobiga 1 080 ta yangi o‘rin yaratish rejalashtirilmoqda. Bundan tashqari, uchta umumta’lim maktabini qurish evaziga 2 040 o‘quvchi o‘rni tashkil etilishi ko‘zda tutilgan.

Ushbu loyihalarni amalga oshirishdan maqsad – bolalarning zamonaviy va qulay sharoitlarda ta’lim olishini, ota-onalar esa o‘z uylari yaqinida sifatli ijtimoiy infratuzilma mavjudligiga ishonch hosil qilishlarini ta’minlashdir.

Tashrif yakunida Toshkent shahridagi Turin politexnika universiteti majlislar zalida Olmazor tumanini ijtimoiy-iqtisodiy rivojlantirish masalalariga bag‘ishlangan uchrashuv bo‘lib o‘tdi.

Aholiga hududda amalga oshirilayotgan loyihalar, joriy ishlar va kelgusi rivojlanish rejalari to‘g‘risida axborot berildi. Uchrashuv davomida ishtirokchilar o‘zlarini qiziqtirgan savollarni berish, takliflar bildirish va mutasaddi xizmatlar e’tiborini mahallalardagi dolzarb vazifalarga qaratish imkoniga ega bo‘ldilar.

Uchrashuvlar yakuni bo‘yicha shahar hokimi mas’ullarga aholidan kelib tushgan murojaat va takliflarni atroflicha o‘rganish, ularni hal etish bo‘yicha amaliy chora-tadbirlarni belgilash hamda ijro ustidan doimiy nazoratni ta’minlashni tavsiya qildi. Mahallalarni obodonlashtirish, ijtimoiy va ta’lim infratuzilmasini rivojlantirish, xizmatlar sifatini oshirish, ko‘kalamzorlashtirish hamda qulay shahar muhitini yaratishga alohida e’tibor qaratish topshirildi.

Ochiq hisobdorlik va muloqotning yangi formati aholining nafaqat olib borilayotgan ishlar haqida xabardor bo‘lishi, balki shahar taraqqiyotining bevosita ishtirokchisiga aylanishiga qaratilgan. Hokimlik bunday uchrashuvlar orqali aholi bilan yanada ishonchli va tushunarli muloqot o‘rnatishga intiladiki, unda har bir murojaat diqqat bilan ko‘rib chiqiladi, qarorlar esa odamlarning real ehtiyojlari inobatga olingan holda qabul qilinadi.

Toshkentni rivojlantirish – hokimlik, shahar xizmatlari va shaharliklarning o‘zlariga yuklatilgan umumiy vazifadir. Faqat ochiq muloqot, mas’uliyat va hamjihatlikdagi sa’y-harakatlar orqaligina poytaxtni bosqichma-bosqich yanada yashil, qulay, zamonaviy va yashash uchun farovon makonga aylantirish mumkin.