Тошкент шаҳар ҳокими Шавкат Умурзаков Олмазор туманига ташриф буюриб, маҳалла фуқаролари, фаоллар, ногиронлиги бўлган шахслар ҳамда ижтимоий соҳа вакиллари билан учрашувлар ўтказди.

Ташриф «Маълумот, ҳисобот, мулоқот» номли тўлиқ янги форматда бўлиб ўтди. Ундан мақсад — аҳолини давлатимиз амалга оширилаётган лойиҳалар ҳақида хабардор қилиш билангина чекланиб қолмай, балки доимий қайта алоқани йўлга қўйиш, ҳудудларнинг эҳтиёжларини очиқ муҳокама қилиш, бажарилаётган ишлар юзасидан ҳисобот бериш ҳамда фуқаролар билан биргаликда келажакдаги амалий ечимларни белгилаб олишдан иборат.

Бундай ҳисобот учрашувларини пойтахтнинг барча туманларида ўтказиш режалаштирилган. Ҳокимликнинг асосий вазифаси — давлатимиз Раҳбарининг ташаббуслари доирасида аҳоли билан биргаликда Тошкентни дунёнинг энг илғор пойтахтлари билан қиёсланадиган қулай, замонавий ва яшаш учун барча шароитларга эга мегаполисга изчил айлантиришдир.

Ташриф давомида шаҳар ва туманнинг мутасадди хизматлари аҳолига амалга оширилаётган лойиҳалар, бажарилаётган ишлар ва ҳудудни ривожлантириш бўйича режалаштирилган чора-тадбирлар ҳақида маълумот тақдим этди. Суҳбат ҳокимликнинг масъул тузилмалари ва тегишли ташкилотлар иштирокида очиқ мулоқот тарзида кечди.

Суҳбат давомида ижтимоий хизматлардан фойдаланиш, реабилитация, даволаниш, таълим олиш, шунингдек, кундалик ҳаёт учун зарур шарт-шароитларни яратиш масалалари муҳокама қилинди. Иштирокчиларга амалдаги қўллаб-қувватлаш чоралари ва айрим турдаги ижтимоий хизматларни олиш тартиби бўйича тушунтиришлар берилди.

Шаҳар ҳокими шаҳар лойиҳаларини режалаштиришда барча аҳолининг, жумладан, ногиронлиги бўлган шахслар, кекса авлод вакиллари ва ижтимоий хизматларнинг алоҳида эътиборига муҳтож кишиларнинг эҳтиёжларини ҳисобга олиш муҳимлигини таъкидлади. Муҳокама якунлари бўйича мутасадди ташкилотларга мурожаатларни янада синчиклаб ўрганиш ва кўрсатилаётган хизматлар сифатини яхшилаш юзасидан тавсиялар берилди.

Навбатдаги манзил «Гулзор» маҳалласида жойлашган 180 ўринли 4-сонли мактабгача таълим ташкилоти бўлди. Бу ерда болалар учун яратилган шароитлар ўрганилди, шунингдек, муассаса ходимлари, ота-оналар ва маҳалла аҳли билан мулоқот қилинди.

Таълим соҳаси вакиллари туманнинг таълим инфратузилмасини кенгайтириш борасида олиб борилаётган ишлар ҳақида маълумот бердилар. Мактабгача таълим қамровини кенгайтириш, болалар учун қулай шароитлар яратиш, педагогларни қўллаб-қувватлаш ва таълим муассасаларини янада ривожлантириш масалалари муҳокама этилди.

2026 йилда Олмазор туманида иккита мактабгача таълим объекти қуриш ҳисобига 1 080 та янги ўрин яратиш режалаштирилмоқда. Бундан ташқари, учта умумтаълим мактабини қуриш эвазига 2 040 ўқувчи ўрни ташкил этилиши кўзда тутилган.

Ушбу лойиҳаларни амалга оширишдан мақсад — болаларнинг замонавий ва қулай шароитларда таълим олишини, ота-оналар эса ўз уйлари яқинида сифатли ижтимоий инфратузилма мавжудлигига ишонч ҳосил қилишларини таъминлашдир.

Ташриф якунида Тошкент шаҳридаги Турин политехника университети мажлислар залида Олмазор туманини ижтимоий-иқтисодий ривожлантириш масалаларига бағишланган учрашув бўлиб ўтди.

Аҳолига ҳудудда амалга оширилаётган лойиҳалар, жорий ишлар ва келажакдаги ривожланиш режалари тўғрисида ахборот берилди. Учрашув давомида иштирокчилар ўзларини қизиқтирган саволларни бериш, таклифлар билдириш ва мутасадди хизматлар эътиборини маҳаллалардаги долзарб вазифаларга қаратиш имконига эга бўлдилар.

Учрашувлар якуни бўйича шаҳар ҳокими масъулларга аҳолидан келиб тушган мурожаат ва таклифларни атрофлича ўрганиш, уларни ҳал этиш бўйича амалий чора-тадбирларни белгилаш ҳамда ижро устидан доимий назоратни таъминлашни тавсия қилди. Маҳаллаларни ободонлаштириш, ижтимоий ва таълим инфратузилмасини ривожлантириш, хизматлар сифатини ошириш, кўкаламзорлаштириш ҳамда қулай шаҳар муҳитини яратишга алоҳида эътибор қаратиш топширилди.

Очиқ ҳисобдорлик ва мулоқотнинг янги формати аҳолининг нафақат олиб борилаётган ишлар ҳақида хабардор бўлиши, балки шаҳар тараққиётининг бевосита иштирокчисига айланишига қаратилган. Ҳокимлик бундай учрашувлар орқали аҳоли билан янада ишончли ва тушунарли мулоқот ўрнатишга интиладики, унда ҳар бир мурожаат диққат билан кўриб чиқилади, қарорлар эса одамларнинг реал эҳтиёжлари инобатга олинган ҳолда қабул қилинади.

Тошкентни ривожлантириш — ҳокимлик, шаҳар хизматлари ва шаҳарликларнинг ўзларига юклатилган умумий вазифадир. Фақат очиқ мулоқот, масъулият ва ҳамжиҳатликдаги саъй-ҳаракатлар орқалигина пойтахтни босқичма-босқич янада яшил, қулай, замонавий ва яшаш учун фаровон маконга айлантириш мумкин.