Asrlar davomida maskarabozlar shahar va qishloq maydonlarida hazil-mutoyiba spektakllari koʻrsatib kelgan. Toshkentda birinchi qoʻgʻirchoq studiyasi 1928-yilda Yosh tomoshabinlar teatrida ochilgan, 1939-yilda esa birinchi qoʻgʻirchoq teatri tashkil etilgan. U Pionerlar saroyi — sobiq buyuk knyaz Nikolay Romanov qarorgohi yonida joylashgan edi.

1979-yilda, oʻzining 40 yillik yubileyiga bagʻishlab, Respublika qoʻgʻirchoq teatri «Kosmonavtlar» metro stansiyasi yaqinida yangi bino oldi. Meʼmor Valeriy Kuzlyanov loyihasi boʻyicha qurilgan bino Toshkentda oʻtkazilgan Osiyo mamlakatlari qoʻgʻirchoq teatrlarining xalqaro festivali kunlarida ochilgan edi.

Teatrga kelish haqiqiy ertakka sayohatga aylanadi: yoʻlakda rang-barang fantastik mavjudotlar tasvirlangan favvoralar, kirish eshigi ustida «jonlanadigan» mis maskarabozlar kutib oladi; foyening balkonchalari va koʻp sonli nishalarida qoʻgʻirchoqlar koʻrgazmasi, ichki hovlida esa afsonaviy qahramonlar bilan sehrli syujetlar gavdalantirilgan. Bolalar ham, kattalar ham uchun haqiqiy bayram!

Ochilganidan 45 yil oʻtgach teatr rekonstruksiya qilindi va yangilandi, lekin tashqi koʻrinishi saqlanib qoldi. Hozir u «Oʻzbek milliy qoʻgʻirchoq teatri» deb ataladi, repertuarida oʻzbek va rus tillaridagi spektakllar doimiy joy olgan.

Teatr jamoasi koʻplab xalqaro festivallarda ishtirok etadi, binoning oʻzi esa poytaxtning eng yorqin meʼmoriy bezaklaridan biri boʻlib qolmoqda.